Վարչապետի պաշտոնակատար Նիկոլ Փաշինյանը շնորհավորական ուղերձ է հղել Միավորված ազգերի կազմակերպության Գլխավոր քարտուղար Անտոնիո Գուտերեշին՝ պաշտոնում վերանշանակվելու կապակցությամբ: Ուղերձում ասված է.
«Ձերդ Գերազանցություն,
Ջերմորեն շնորհավորում եմ Ձեզ Միավորված ազգերի կազմակերպության Գլխավոր քարտուղարի պաշտոնում վերանշանակման կապակցությամբ։
Արդի աշխարհաքաղաքական բազում մարտահրավերների պայմաններում անգնահատելի է բազմակողմանի դիվանագիտության ներդրումը։ Այս համատեքստում ՄԱԿ-ի համակարգը մնում է այն կարևորագույն հարթակը, որը զարկ է տալիս համաշխարհային ջանքերին՝ ուղղված խաղաղությանը, մարդու իրավունքների հարգմանը և կայուն զարգացմանը։
Գլխավոր քարտուղարի պաշտոնում Ձեր առաջին ժամկետի ընթացքում Դուք ցուցաբերել եք առաջնորդություն այս ուղղությամբ, ինչպես և Ձեր նվիրվածությունը ՄԱԿ-ի սկզբունքներին ու արժեքներին։
Հայաստանի Հանրապետությունն ուրախ է աջակցելու և համագործակցելու Ձեզ հետ նաև Ձեր վերահաստատված մանդատի ընթացքում՝ համատեղ ջանքերով նպաստելու միջազգային և տարածաշրջանային անվտանգության ու խաղաղության ամրապնդմանը։
Ընդունեք խնդրեմ, Ձերդ Գերազանցություն, խորին հարգանքներիս հավաստիքը»։