Վարչապետ Նիկոլ Փաշինյանը շնորհավորական ուղերձ է հղել Ավստրիայի Հանրապետության Դաշնային կանցլեր Քրիստիան Շտոկերին՝ Ազգային տոնի առիթով: Ուղերձում նշված է.
«Ջերմորեն շնորհավորում եմ Ձեզ և Ավստրիայի բարեկամ ժողովրդին Ավստրիայի Հանրապետության ազգային տոնի կապակցությամբ։
Հայաստանը մեծապես կարևորում է Ավստրիայի հետ ընդհանուր արժեքների, փոխադարձ հարգանքի և վստահության վրա հիմնված բարեկամական հարաբերությունների զարգացումը ինչպես երկկողմ մակարդակում, այնպես էլ բազմակողմ ձևաչափերում։
Լիահույս եմ, որ համատեղ ջանքերով կնպաստենք բազմոլորտ համագործակցության ընդլայնմանը փոխադարձ հետաքրքրություն ներկայացնող բոլոր ոլորտներում՝ ներառյալ Հայաստան-ԵՄ գործընկերության շրջանակում։
Բարձր ենք գնահատում Հայաստանի Հանրապետության կառավարության համար առաջնահերթ ոլորտներում Ավստրիայի զարգացման գործակալության կողմից տարիներ շարունակ իրականացվող ծրագրերը:
Թույլ տվեք ևս մեկ անգամ շնորհավորել այս հիշարժան օրվա առթիվ՝ մաղթելով Ձեզ քաջառողջություն և հաջողություն, իսկ Ավստրիայի ժողովրդին՝ խաղաղություն և բարօրություն»։