Վարչապետ Նիկոլ Փաշինյանը շնորհավորական ուղերձ է հղել Թուրքմենստանի նախագահ Սերդար Բերդիմուհամեդովին՝ Անկախության օրվա առիթով: Ուղերձում ասված է.
«Սրտանց շնորհավորում եմ Ձեզ և բարեկամ թուրքմեն ժողովրդին ազգային տոնի՝ Թուրքմենստանի Անկախության օրվա առիթով:
Անկախության հռչակումից ի վեր Թուրքմենստանը զգալի հաջողությունների է հասել տնտեսական և սոցիալ-քաղաքական բարեփոխումների ոլորտներում` իր արժանի տեղը զբաղեցնելով միջազգային հարաբերությունների համակարգում:
Վստահ եմ, որ Հայաստանի և Թուրքմենստանի միջև ավանդաբար ձևավորված բարեկամական հարաբերություններն ապագայում կշարունակեն հետևողականորեն զարգանալ և ընդլայնվել՝ ի նպաստ մեր երկրների և ժողովուրդների բարօրության և բարգավաճման ապահովման:
Անհամբերությամբ սպասում եմ մեր առաջիկա հանդիպումներին Ավազայում և Երևանում, որոնք լավ հնարավորություն կընձեռեն բովանդակալից երկխոսություն անցկացնելու համար:
Օգտվելով առիթից՝ մաղթում եմ Ձեզ քաջառողջություն և ամենայն բարիք, իսկ Թուրքմենստանի բարեկամ ժողովրդին՝ խաղաղություն և հետագա առաջընթաց»: