Վարչապետ Նիկոլ Փաշինյանն այսօր աշխատանքային այցով մեկնել է Լոռու մարզ: Վանաձորում կայացած խորհրդակցության ժամանակ վարչապետին ներկայացվել է Լոռու մարզպետի աշխատակազմի 2022թ. գործունեության հաշվետվությունն ու ընթացիկ տարում իրականացվող ծրագրերի ընթացքը:

Խորհրդակցությանը մասնակցել են Տարածքային կառավարման և ենթակառուցվածքների նախարար Գնել Սանոսյանը, Պետական վերահսկողական ծառայության պետ Ռոմանոս Պետրոսյանը, Լոռու մարզպետ Արամ Խաչատրյանը, Էկոնոմիկայի նախարարի տեղակալ Արման Խոջոյանը և պաշտոնատար այլ անձինք:

Կառավարության ղեկավարին նախ զեկուցվել են Լոռու մարզի 2022թ. մակրոտնտեսական ցուցանիշները: Ըստ այդմ՝ արդյունաբերական արտադրանքի ծավալը հաշվետու տարում կազմել է 92,4 մլրդ դրամ, փաստացի աճը 2021թ. նկատմամբ կազմել է 60,9 տոկոս, տեսակարար կշիռը հանրապետական ծավալում կազմել է 3,4 տոկոս: Գյուղատնտեսական համախառն արտադրանքի ծավալը 2022 թ. կազմել է 88,5 մլրդ դրամ, փաստացի աճը 2021թ. նկատմամբ կազմել է 112,4 տոկոս, շինարարության ծավալը կազմել է 22,5 մլրդ դրամ, փաստացի աճը 2021 թ. նկատմամբ կազմել է 109,8 տոկոս, առևտրի շրջանառությունը կազմել է 34 մլրդ դրամ, փաստացի աճը 2021թ. նկատմամբ կազմել է 104,6 տոկոս, ծառայությունների ծավալը կազմել է 29,6 մլրդ դրամ, փաստացի աճը 2021 թ. նկատմամբ կազմել է 129,1 տոկոս:

Վարչապետին զեկուցվել է 2018-2022 թթ. սուբվենցիոն ծրագրերի մասին: Հաշվետու տարիներին իրականացված սուբվենցիոն ծրագրերը 307-ն են, որոնց արժեքը կազմել է 12,2 մլրդ դրամ, որից պետական բյուջեի մասը կազմում է 6,2 մլրդ դրամ: 2018թ. ծրագրերի քանակը եղել է 20-ը 505 մլն դրամ արժողությամբ, 2019 թ. եղել է 55 ծրագիր` 1,8 մլրդ դրամ արժողությամբ, 2020 թ.` 96 ծրագիր 3,7 մլրդ դրամ արժողությամբ, 2021-ին` 96 ծրագիր 3,860 մլրդ դրամ արժողությամբ, 2022-ին` 40 ծրագիր 2,323 մլրդ դրամ արժողությամբ: Սուբվենցիոն ծրագրերը ներառել են հետևյալ ոլորտները՝ ասֆալտապատում՝ 51 ծրագիր` 46.42 կմ, լուսավորություն՝ 47 ծրագիր` 822 փողոց, ջրամատակարարում՝ 26 ծրագիր, 91.4 կմ, ոռոգման համակարգ՝ 20 ծրագիր, 57.1 կմ, մանկապարտեզներ՝ 11 ծրագիր, սալարկում՝ 42 ծրագիր, 39.14 կմ, գազիֆիկացում՝ 6 ծրագիր, 822 տնտեսություն, բազմաբնակարան շենքերի նորոգում՝ 14 ծրագիր, հասարակական շենքերի նորոգում՝ 39 ծրագիր, տեխնիկա, գույքի ձեռքբերում՝ 27 ծրագիր, ֆոտովոլտային կայաններ՝ 8 ծրագիր, զբոսայգի/պուրակ՝ 16 ծրագիր:

Վարչապետին ներկայացնելով ընթացիկ տարվա սուբվենցիոն ծրագրերի մասին տեղեկատվությունը՝ նշվել է, որ հաստատվել է 47 ծրագիր` 7,45 մլրդ դրամ արժեքով և 152 ենթածրագրով: Այդ ծրագրերի ֆինանսավորման պետական բյուջեի մասը կազմում է 4,25 մլրդ դրամ, համայնքային բյուջեի մասը՝ 2,51 մլրդ դրամ, այլ միջոցները՝ 0,69 մլրդ դրամ:

Մարզում գյուղատնտեսական նշանակության հողերը 250.844 հա է, անտառային ֆոնդը՝ 100.6 հա: Ընդգծվել է, որ գյուղատնտեսության ոլորտում 2021 թ. համեմատությամբ 2022 թ. ցանքատարածություններն ավելացել են 443 հա-ով: Կաթիլային ոռոգվող այգիները 2021 թ. եղել է 90 հա, իսկ 2022-ին դրանք կազմել են 130 հա, ինտենսիվ այգիները 2021 թ. եղել է 70 հա, իսկ 2022 թ.` 110 հա: Զեկուցվել է նաև, որ մարզում գործում են 14 խելացի անասնագոմեր, 8 սպանդանոցներ, 86 հակակարկտային կայաններ, 12 սառնարանային տնտեսություններ՝ 615 տոննա հզորությամբ:

Մարզում գյուղատնտեսության ոլորտի ներդրումների ծավալը 2022թ. կազմել է շուրջ 8 մլրդ: Կառավարության ղեկավարին ներկայացվել է նաև գյուղատնտեսության բնագավառում առկա ձեռքբերումները: Կանաչ գյուղատնտեսություն ծրագրի շրջանակներում ձեռք են բերվել պարարտանյութեր և թունաքիմիկատներ ցրող անօդաչու թռչող սարք՝ 50 հազար եվրո արժողությամբ: Մարզի աշխատանքային խմբի կողմից մշակվել է 2022-2025 թթ. մարզի գյուղատնտեսության ռազմավարությունը: ՀՀ կառավարության, Եվրասիական զարգացման բանկի և «Երեմյան Փրոջեքթս» ընկերությունների խմբի «Երեմյան ֆարմի» համագործակցությամբ մեկնարկել է նոր կառուցվող անասնաբուծական համալիրի կառուցման գործընթացը։ Ծրագրի ընդհանուր արժեքը 31 մլն դոլար է։ Տաշիրի տարածաշրջանում «Բոզոյան» ընկերության կողմից 2022 թ. հիմնվել է խոզաբուծական տնտեսություն՝ համալրված 504 գլուխ խոզամոր հաշվարկով: Ներդրման չափը կազմել է 3 մլն դոլար, տարեկան կարտադրվի 400-500 տոննա խոզի միս: Տաշիրի տարածաշրջանում հիմնվել է «Տաշիր Ագրո» տավարաբուծական համալիրը: Ձեռք են բերվել 481 գլուխ Սիմենթալ ցեղատեսակի խոշոր եղջերավոր կենդանիներ:

Ներկայացնելով հողօգտագործման մասով կատարված փոփոխությունները՝ նշվել է, որ տեղի է ունեցել հողամասերի նպատակային նշանակության փոփոխություն՝ 18.28 հա, գյուղատնտեսականի փոփոխություն՝ 17.16 հա, որի արդյունքում համայնքային բյուջե է մուտքագրվել 27.5 մլն դրամով, 46951 հա համայնքային և պետական սեփ. հողերի վարձակալության արդյունքում համայնքային բյուջե է մուտքագրվել 217.5 մլն դրամ, 56.58 հա աճուրդ վաճառք արդյունքում համայնքային բյուջեն համալրվել է 171.8 մլն դրամով:

Անդրադառնալով կրթության բնագավառին՝ նախ ներկայացվել է մարզում առկա կրթական հաստատությունների թիվը, ըստ որի հանրակրթական հաստատությունները 163-ն են, մարզային ենթակայության դպրոցները 149-ը, սմարթ դասարանները՝ 37-ը, Արմաթ լաբորատորիաները՝ 114-ը: Այնուհետև զեկուցվել է դպրոցներում իրականացվող աշխատանքների մասին, ըստ որի` 6 դպրոցում բացվել են էկոդասարաններ, 32 դպրոցում հիմնվել են պտղատու այգիներ, հատապտղային՝ 10, վերանորոգվել և վերազինվել է 14 դպրոց, 25 դպրոցում տեղադրվել են արևային կայաններ, 7 դպրոցում առկա են ջերմոցային տնտեսություններ, ատեստավորվել է 827 ուսուցիչ, կամավոր ատեստավորվել է 64 ուսուցիչ: Կամավոր ատեստավորում անցած ուսուցիչներից ամենաբարձր աշխատավարձը կազմում է ավելի քան 400 հազար դրամ:

Մարզում գործում է 74 մանկապարտեզ: 2018-2022 թթ. կառուցվել և հիմնանորոգվել է 26 մանկապարտեզ, որից սուբվենցիայով 12 մանկապարտեզի աշխատանքներն ավարտված են, 7-ի աշխատանքներն ընթացքի մեջ են, ՀՏԶՀ-ով իրականացվել է 2 մանկապարտեզի կառուցում, հիմնանորոգում, ընթացքի մեջ են պետական բյուջեով 4 (մոդուլային) մանկապարտեզի շինարարական աշխատանքները, Տաշիր հիմնադրամի կողմից աշխատանքներ են իրականացվում 1 մանկապարտեզում:

Ինչ վերաբերում է քաղաքաշինության ոլորտին, ըստ պատասխանատուների, մարզում կապիտալ շինարարության ոլորտի հատկացումներն ըստ ֆինանսավորման աղբյուրի, հետևյալ տեսքն ունեն՝ մասնավորի հատկացումները կազմում է 26 մլն 235 հազար դրամ, միջազգային հատկացումները՝ 279 մլն դրամ, համայնքային հատկացումները՝ 1 մլրդ 622 մլն դրամ, պետական բյուջեից հատկացումները՝ 3 մլրդ 920 մլն դրամ:

Կառավարության ղեկավարին զեկուցվել է, որ քաղաքաշինության ոլորտում ներդրումների ծավալը 2022թ. կազմել է 5,8 մլրդ դրամ: Ըստ այդմ՝ ավարտվել են 153 ընտանիքի բնակելի տների շինարարական աշխատանքները՝ «Ֆուլեր տնաշինական կենտրոն» բարեգործական հասարակական կազմակերպության կողմից, վերանորոգվել և վերազինվել է 14 դպրոց, իրականացվել են 2 պետական քոլեջի վերակառուցման աշխատանքներ, վերակառուցվել է 1 հիմնական դպրոցի մեկ մասնաշենք, 17 դպրոցում անհետաձգելի համարվող կապիտալ բնույթի ծրագրեր են իրականացվել, 3 համայնքում կառուցվում են դպրոցներ, մեկնարկել են 1 համայնքում՝ «Մոդուլային» տիպի 144 տեղ հզորությամբ մսուր մանկապարտեզի կառուցման աշխատանքները, 2 համայնքում կառուցվում են «Մոդուլային» տիպի դպրոցներ, 7 համայնքում իրականացվում են դպրոցների մարզադահլիճների կառուցման և հիմնանորոգման շինարարական աշխատանքներ, 2022թ. ՀՏԶՀ-ի կողմից իրականացվել են շուրջ 1,9 մլրդ դրամի շինարարական աշխատանքներ:

Խորհրդակցության ժամանակ տեղեկատվություն է ներկայացվել մարզում ճանապարհաշինության ուղղությամբ իրականացված աշխատանքների մասին, ըստ որի` ճանապարհաշինության բնագավառում ներդրումների ծավալը կազմել է 13,9 մլրդ դրամ, հիմնանորոգվել է 103,4 կմ ճանապարհ: Այսպիսով՝ պետական բյուջեի միջոցներով հիմնանորոգվել է 30,4 կմ երկարությամբ Մ-3 միջպետական նշանակության ճանապարհ, արժեքը՝ 4.7 մլրդ դրամ, 6 կմ երկարությամբ Հ-33 հանրապետական նշանակության ճանապարհ, արժեքը՝ 642.4 մլն դրամ, 7,3 կմ երկարությամբ մարզային նշանակության ճանապարհ, արժեքը՝ 436.8 մլն դրամ, սուբվենցիոն ծրագրերով 26,4 կմ երկարությամբ ճանապարհ, արժեքը՝ 4.6 մլրդ դրամ: Վարկային միջոցներով հիմնանորոգվել է 28,93 կմ երկարությամբ Մ6 միջպետական նշանակության ճանապարհ, արժեքը՝ 3.15 մլրդ դրամ, 4,37 կմ երկարությամբ Տ-5-33 մարզային նշանակության ճանապարհ, արժեքը՝ 102.6 մլն. դրամ:

Զեկուցվել է նաև ենթակառուցվածքների բարելավման ուղղությամբ իրականացված աշխատանքների մասին: Մասնավորապես՝ ջրամատակարարման ոլորտում հայ-գերմանական համագործակցության ծրագրի շրջանակներում KFW բանկի ֆինանսավորմամբ նախատեսված են Վանաձորի 8-րդ ճնշումային գոտու բաշխիչ ցանցի վերակառուցման աշխատանքները, որի արժեքը կազմում է 905.2 մլն. դրամ: «Վեոլիա ջուր» ընկերության կողմից իրականացվել են հետևյալ աշխատանքները՝ նոր քլորակայանի կառուցում՝ 10.3 մլն դրամ արժողությամբ, բնակավայրերի ջրամատակարարման և ջրահեռացման համակարգերի բարելավում՝ 1.8 մլն դրամ արժողությամբ, Վարդաբլուր և Աղեգի համայնքներում քլորակայանների վերանորոգում՝ 5.8 մլն դրամ արժողությամբ: Նշվել է, որ աղբավայրերի թիվը 5-ն է, աղբահանություն իրականացնող համայնքների թիվը 11-ը: 2022թ. ֆոտովոլտային կայաններ են տեղադրվել մարզի 8 համայնքներում:

Անդրադարձ է կատարվել նաև առողջապահության ոլորտին, նշվել է, որ մարզում գործում է մարզային ենթակայության 29 բուժհաստատություն, 5 բժշկական կենտրոն, 1 դիսպանսեր, 4 պոլիկլինիկա, 19 առողջության առաջնային պահպանման կենտրոն, հիվանդանոցային հզորությունը 461 մահճակալ է: Ոլորտում ներդրումների ծավալը կազմում է 1,7 մլրդ դրամ: «Վանաձորի բժշկական կենտրոն»-ում բացվել է «Ֆիզիոթերապիայի և վերականգնողական բժշկության բաժանմունք», որը հագեցվել է «Ազնավուր հիմնադրամ»-ի աջակցությամբ: 2023թ. «Սպիտակի բժշկական կենտրոն»-ը սեփական միջոցներով ձեռք է բերել Siemens գերմանական ապրանքանիշի գերհզոր Siemens go.Up համակարգչային տոմոգրաֆ՝ 162 մլն դրամ արժեքով: Առողջապահության նախարարության կողմից 2022թ. մարզի 4 առողջապահական հաստատություններին տրամադրվել են թվային ռենտգեն սարքավորումներ, «Ալավերդու բժշկական կենտրոն»-ին անհատույց 5 տարի ժամկետով տրամադրվել է ամենագնաց շտապ օգնության ավտոմեքենա:

«Հայաստանի Մանուկներ Բարեգործական հիմնադրամ»-ի («COAF») կողմից կառուցվել է «Դսեղի առողջության կենտրոն» ՊՈԱԿ-ի նոր, ժամանակակից սարքավորումներով և գույքով հագեցած շենք: Ներդրումների ծավալը կազմում է 400 մլն դրամ:

Միջազգային համագործակցության շրջանակում «Հայաստանի մանուկներ» բարեգործական հիմնադրամի (COAF) կողմից շուրջ 20 մլրդ դրամի ներդրում է կատարվել գյուղական համայնքների զարգացման ծրագրերի շրջանակում: Մարզպետարանի նախաձեռնությամբ կազմակերպվել է Լոռու մարզի տնտեսական զարգացման համաժողովը: ԵՄ «Տեղական դերակատարների զորեղացում հանուն զարգացման Լոռու և Տավուշի մարզերում» ծրագրի շրջանակում շուրջ 11.6 մլն դրամի ներդրում է կատարվել:

Զբոսաշրջության բնագավառում ներդրումների ծավալը 2022թ. կազմել է շուրջ 1,8 մլրդ դրամ: Հյուրանոցային տնտեսություններ թիվը 273-ն է, որից 20-ը նոր հյուրանոցային տնտեսություններ են: 2022թ. մեկնարկել են Լոռու մարզի զբոսաշրջության զարգացման 2023-2027 թթ. ռազմավարության նախագծի մշակման աշխատանքները:

Վարչապետին ներկայացնելով մշակույթի և սպորտի բնագավառում իրականացված աշխատանքներն ու ընթացիկ ծրագրերը՝ նշվել է, որ մարզում առկա է 19 մարզադպրոց, 3 մարզակումբ, 21 գրադարան, 8 թանգարան, 28 երաժշտական, արվեստի, գեղարվեստի պարարվեստի դպրոց: Լոռի-Փամբակ երկրագիտական թանգարանում վերականգնվել է շուրջ 21 հնագիտական իր: Թանգարանում կազմակերպվել են 7 թեմատիկ ցուցադրություններ: Այցելուների թիվը 2021 թ. կազմել է 2534, իսկ 2022 թ.՝ 3972: 7 դպրոցում իրականացվել են մարզադահլիճների հիմնանորոգման, շինարարական աշխատանքներ: Սպորտդահլիճներ են առկա 88 դպրոցում, որից նորոգման ենթակա են 64-ը:

Խորհրդակցության ժամանակ խոսվել է նաև առաջիկա ծրագրերի մասին: Մասնավորապես՝ նշվել է, որ Լոռու մարզպետարանի և Վանաձորի համայնքապետարանի հետ համատեղ մշակվել է Վանաձոր համայնքի կայուն զարգացման ծրագիրը: Ծրագրի ընդհանուր արժեքը 27 մլն եվրո է: Լոռու մարզպետարանի հետ համատեղ մշակվել և Հայաստանի տարածքային զարգացման հիմնադրամի կողմից հաստատվել են Վանաձոր, Սպիտակ, Թումանյան և Փամբակ խոշորացված համայնքների կոմունալ և սանիտարական պայմանների բարելավման ծրագրերը: «Ներդրումների աջակցման կենտրոն» հիմնադրամի և Լոռու մարզպետարանի համատեղ ջանքերով ընթացքի մեջ է «Երևանի շոկոլադի գործարան» ընկերության ներդրումային ծրագիրը: Սիմոնյան կրթական հիմնադրամի կողմից մարզի 7 համայնքներում ընթացքի մեջ է 11 Թումո տուփերի և Վանաձորում Թումո կենտրոնի կառուցման գործընթացը:

Առաջիկա ծրագրերի շարքում են նաև «Տաշիրի բժշկական կենտրոն»-ի նոր շենքի կառուցումը, «Վանաձորի բժշկական կենտրոն»-ի կազմում գործող «Վարակաբանական բաժանմունք»-ի նոր մասնաշենքի կառուցումը, «Ստեփանավանի բժշկական կենտրոն»-ի հեմոդիալիզի բաժանմունքի բացումը:

Շարունակելով ներկայացնել առաջիկա ծրագրերի մասին տեղեկատվություն՝ նշվել է նաև Լոռու մարզի Ստեփանավան համայնքի Աշոտաբերդ թաղամասում առկա վթարային փայտյա բնակելի շենքերի փոխարեն նոր թաղամասի կառուցումը, որի արդյունքում 309 ընտանիք կունենա նոր բնակարան: Ներդրումների ծավալը 2022 թ. կազմել է 24,3 մլն դրամ: Խոսվել է նաև 4 համայնքներում «Մոդուլային» տիպի 144 տեղ հզորությամբ մսուր-մանկապարտեզի կառուցման աշխատանքների մասին, որի ներդրումների ծավալը 2022 թ. կազմել է 14,8 մլն դրամ: Նաև նշվել է, որ 2023 թ. Լոռու մարզում նախատեսված ճանապարհաշինական աշխատանքների ընդհանուր ծրագրային արժեքը կազմում է 14.3 մլրդ դրամ, որով նախատեսվում է հիմնանորոգել 109.8 կմ երկարությամբ ճանապարհներ:

Վարչապետը խորհրդակցության ընթացքում անդրադարձել է դպրոցների կառուցման, ինտենսիվ այգեգործության ընդլայնման, գյուղատնտեսական տնտեսություններին անհրաժեշտ խորհրդատվության տրամադրման, այլ ճյուղերի զարգացման, ճանապարհաշինության, դպրոցների և մանկապարտեզների հիմնանորոգման ու կառուցման, ինչպես նաև այլ ծրագրերին, պատասխանատուներին տվել համապատասխան հանձնարարականներ:

***

Լոռու մարզ այցի շրջանակում վարչապետ Նիկոլ Փաշինյանը ծանոթացել է Կառավարության ֆինանսավորմամբ և սուբվենցիոն ծրագրերով համայնքներում իրականացված և ընթացքում գտնվող ծրագրերին:

Նիկոլ Փաշինյանի առաջին կանգառը եղել է Վանաձոր համայնքի Խորենացի փողոցը, որի 2 երթևեկելի գոտիներում իրականացվում են գրեթե 1 կմ հիմնանորոգման աշխատանքներ: Ծրագրի ընդհանուր արժեքը կազմում է 272.8 մլն դրամ: Միջոցները հատկացրել է Կառավարությունը:

Հաջորդիվ վարչապետը եղել է Վանաձոր համայնքի «Իտեքս» ընկերությունում և ծանոթացել վերջինիս գործունեությանը: Հայ-իտալական «Իտեքս» ընկերությունը հիմնադրվել է 2022 թ.-ի մայիսին։ Այն զբաղվում է իտալական հանրահայտ բրենդների հագուստի արտադրությամբ և ունի մոտ 1000 աշխատակից: Ներկայումս ընկերությունն ունի 14 արտադրական հոսքագիծ, սակայն առաջիկայում պլանավորվում է արտադրական ծավալներն հասցնել մինչև 24 հոսքագծի։

Կառավարության ղեկավարը ծանոթացել է նաև Վանաձորի բժշկական կենտրոնի ինֆեկցիոն բաժանմունքի շինարարական աշխատանքներին: Երկհարկանի 50 մահճակալ հզորությամբ բաժանմունքի հիմնանորոգման աշխատանքների համար ներդրվում է 891 մլն դրամ: Միջոցները հատկացրել է Կառավարությունը:

Նիկոլ Փաշինյանը եղել է Վանաձորի քաղաքային մարզադաշտում, որը հիմնանորոգվել է Հայաստանի ֆուտբոլի ֆեդերացիայի միջոցներով։ Մարզադաշտի շինաշխատանքները վերսկսվել էին 2021 թվականի հուլիս ամսից։ Այն ունի նոր տրիբունա՝ 3000 նստատեղով, հետագայում նստատեղերի թիվը կարող է ավելանալ, այժմ քննարկվում են նոր տրիբունաներ կառուցելու հնարավորությունները:

Վարչապետն այցելել է Վանաձորի Խ.Աբովյանի անվան թիվ 9 հիմնական դպրոց, որտեղ ծանոթացել է նոր մարզադահլիճի կառուցման շինարարական աշխատանքներին, որոնց 70%-ն արդեն իրականացվել է: 159 աշակերտի համար նախատեսված մարզադահլիճի կառուցման ծրագրի Կառավարությունը հատկացրել է 199.5 մլն դրամ:

Գործադիրի ղեկավարին մանրամասներ են ներկայացվել նաև Վանաձոր համայնքի Հրաչյա Ներսիսյան փողոցի հիմնանորոգման շինարարական աշխատանքների ընթացքի վերաբերյալ: Իրականացվել է շինաշխատանքների 55%-ը: Ընդհանուր կհիմնանորոգվի 1,127 կմ ճանապարհահատված: Սուբվենցիոն ծրագրի արժեքը կազմում է 314 մլն դրամ է: Միջոցների կեսը հատկացրել է Կառավարությունը:

Նիկոլ Փաշինյանի հաջորդ կանգառը եղել է Վանաձոր համայնքի «Գլորիա» կարի ֆաբրիկան: Ընկերությունն արտադրում է եվրոպական որակի պահանջներին համապատասխան արտադրանք, ունի մոտ 2500 աշխատակից: 2 մասնաճյուղերում միասին ամսական արտադրվում են 180,000 հատ տարբեր տեսակի հագուստներ, վերարկուներ, բաճկոններ, մոտոցիկլիստների հագուստներ, տարբեր տեսակի պաշտպանիչ հագուստներ:

Կառավարության ղեկավարը ծանոթացել է Ֆիոլետովո համայնքի կոյուղագծի կառուցման աշխատանքներին: Կառուցվում է 1,676 կմ կոյուղագիծ, 1 մաքրման կայան. Սուբվենցիոն ծրագրի արժեքը 31.500.000 դրամ է, որի 65%-ը հատկացվել է պետական բյուջեից:

Վարչապետին ներկայացրել են Լերմոնտովո համայնքի փողոցների նորոգման աշխատանքները. 550 մետր կառուցված ճանապարհի սալարկմամբ շինարարական աշխատանքներն ավարտվել են: 2022 և 2023 սուբվենցիոն ծրագրի արժեքը կազմել է, համապատասխանաբար, 21 և 22 մլն դրամ: Միջոցների 60 տոկոսը հատկացրել է Կառավարությունը:

Նիկոլ Փաշինյանը ծանոթացել է նաև Մ-6-Եղեգնուտ–Դեբետ ավտոճանապարհի 7.1 կմ երկարությամբ ճանապարհահատվածի հիմնանորոգման աշխատանքներին, որի 90%-ն արդեն կատարվել է: Ճանապարհի հիմնանորոգման սուբվենցիոն ծրագրի արժեքը 846.7 մլն դրամ է: Եղեգնուտում վարչապետը զրուցել է տեղացիների հետ տարբեր հարցերի շուրջ:

Թումանյան համայնքի Դսեղ բնակավայրում վարչապետը ծանոթացել է Հայաստանի մանուկներ հիմնադրամի կողմից կառուցվող «Դսեղի առողջության կենտրոնի» շինարարական աշխատանքներին, որոնք գտնվում են ավարտական փուլում: Ծրագրի ընդհանուր արժեքը 1 մլն դոլար է: 2022թ.-ին ներդրումների ծավալը կազմել է 168 մլն դրամ: Այն կսպասարկի Թումանյանի տարածաշրջանի 7 բնակավայրերի բնակչությանը:

Կառավարության ղեկավարին ներկայացվել են Տ-5-73 /Հ-70/ - Քարինջ մարզային նշանակության ճանապարհի հիմնանորոգման աշխատանքները: 4 կմ հիմնանորոգված ճանապարհի հիմնանորոգման աշխատանքների 80%-ը ավարտվել է, ծրագրի ընդհանուր արժեքը կազմում է 346 մլն դրամ: Միջոցները հատկացրել է Կառավարությունը:

Կատարվել է նաև Մ-6, Վանաձոր - Ալավերդի- Վրաստանի սահման միջպետական նշանակության միջպետական ավտոճանապարհի համապատասխան տեղամասի վերականգնման և բարելավման աշխատանքների 30%-ը: Ծրագրի նպատակով պետական բյուջեից հատկացվել է 954 մլն դրամ:

Նիկոլ Փաշինյանն այցելել է նաև դեպի Կայան բերդ տանող 1,6 կմ երկարությամբ քայլարշավային արահետ, որը հիմնվել է ՀՀ ԿԳՄՍ նախարարության նախաձեռնությամբ և Հայաստանում Նիդեռլանդների Թագավորության դեսպանության աջակցությամբ: Արահետի վրա տեղադրվել են 31 փայտե և 13 քարե աստիճաններ, բարդ հատվածներում մոնտաժվել են երկաթյա աստիճանավանդակներ: Արահետի սկզբնամասում տեղադրվել է մեկնարկային ցուցանակ` անհրաժեշտ տեխնիկական նկարագրությամբ և քարտեզով, ինչպես նաև ուղղորդող ցուցանակներ և գծանշումներ ամբողջ արահետի երկայնքով:

Վարչապետի այսօրվա վերջին կանգառը եղել է Ալավերդիում, որտեղ ծանոթացել է Սանահին-Ակներ 9,3 կմ ավտոճանապարհի շինաշխատանքների ընթացքին: Ծրագրի արժեքը կազմում է շուրջ 2 մլրդ դրամ, որը հատկացվել է պետական բյուջեից:

***

Օգոստոսի 29-ին շարունակվել է վարչապետ Նիկոլ Փաշինյանի այցը Լոռու մարզ:

Վարչապետը նախ այցելել է Ալավերդի համայնքի Հագվի գյուղ, որտեղ ավարտական փուլում է մոդուլային դպրոցի կառուցումը: Ծրագրի իրականացման համար Կառավարությունը հատկացրել է 755 մլն դրամ: 140 աշակերտի համար նախատեսված դպրոցը շահագործման կհանձնվի մինչ դեկտեմբեր:

Հաջորդիվ Նիկոլ Փաշինյանը եղել է Օձուն բնակավայրում՝ ծանոթացել մարզաառողջարանային կենտրոնի կառուցման աշխատանքների ընթացքին, որոնց 80%-ն արդեն ավարտվել է: Մարզաառողջարանային կենտրոնի 2021 և 2022 սուբվենցիոն ծրագրերի համար հատկացվել է, համապատասխանաբար, 114 մլն 433 հազար և 91 մլն 107 հազար դրամ: Միջոցների 55 տոկոսը հատկացրել է Կառավարությունը:

Այնուհետև վարչապետին ներկայացրել են Լոռի Բերդ համայնքի Ագարակ բնակավայրի համայնքային կենտրոնի վերանորոգման և տարածքի բարեկարգման շինարարական աշխատանքները: Կատարվել է աշխատանքների 60%-ը: Հիմնովին վերանորոգված կենտրոնի և 2000 քառ. մ. բարեկարգված տարածքի 2019-2022 և 2023 սուբվենցիոն ծրագրերի արժեքը կազմել է, համապատասխանաբար, 68 մլն 366 հազար և 24 մլն 359 հազար դրամ: Միջոցների 50 տոկոսը տրամադրել է Կառավարությունը:

Նիկոլ Փաշինյանը ծանոթացել է Հ-33, /Մ-3 /Ստեփանավան-Ագարակ-Յաղդան-/Հ-35/ հանրապետական նշանակության ավտոճանապարհի հիմնանորոգման աշխատանքներին, որոնց 95%-ն կատարվել է: 6.1 կմ երկարությամբ ճանապարհի հիմնանորոգման նպատակով գործադիրը հատկացրել է 642 մլն դրամ:

Տաշիր համայնքում կառավարության ղեկավարը եղել է Սարչապետ բնակավայրի մշակույթի տան վերանորոգման շինհրապարակում: Շինարարական աշխատանքները գրեթե ավարտվել են, մոտ 1000 քմ վերանորոգված մշակույթի տան սուբվենցիոն ծրագրի ընդհանուր արժեքը կազմել է 59 մլն դրամ, որի 45 տոկոսը հատկացվել է Կառավարության կողմից:

Ներկայացնելով «Երեմյան Ֆարմ» անասնաբուծական համալիրի ընթացող շինարարական աշխատանքները՝ նշվել է, որ ընկերությունում ներկայումս առկա է 300 գլուխ հոլշտեյն ցեղատեսակի ԽԵԿ: Ծրագրի ընդհանուր արժեքը 31 մլն դոլար է: Նիկոլ Փաշինյանը եղել է նաև «Բոզոյան» ՍՊԸ–ում, որն իրականացնում է ցանքատարածությունների մշակում. տարեկան հզորությունը կազմում է մոտ 2 հազար հեկտար: Ներդրումային ծրագրի ընդհանուր արժեքը մոտ 7 մլն դոլար է:

Նիկոլ Փաշինյանը ծանոթացել է նաև Մ- 3, Թուրքիայի սահման-Մարգարա-Վանաձոր-Տաշիր-Վրաստանի սահման ճանապարհի 22.9 կմ հատվածի հիմնանորոգման աշխատանքներին, որոնք փաստացի ավարտվել են: Ծրագրի ընդհանուր արժեքը կազմում է 3 մլրդ 771 մլն դրամ: Միջոցներն ուղղվել են պետական բյուջեից:

Վարչապետը եղել է Ստեփանավան համայնքի Ստեփանավան բնակավայրի քաղաքային հրապարակում, որտեղ հիմնանորոգման աշխատանքների 80% արդեն իրականացվել է՝ լուսաձայնային էֆեկտներով շատրվաններ, 4700 քմ սալիկապատ անցուղի, 1200 քմ ասֆալտապատ տարածք: Ծրագրի ընդհանուր արժեքն ավելի քան 201 մլն դրամ է: Ստեփանավան քաղաքի Չարենցի փողոցում ևս իրականացում են 1,8 կմ հիմնանորոգման աշխատանքներ, որոնց արժեքը կազմում է ավելի քան 736 մլն դրամ:

Նիկոլ Փաշինյանը ծանոթացել է նաև Գյուլագարակ բնակավայրի արվեստի դպրոցի համայնքային շենքի կառուցման աշխատանքներին: Մոտ 200 քմ կառուցված արվեստի դպրոցի կառուցման սուբվենցիոն ծրագրի արժեքը 74 մլն 900 հազար դրամ է: Միջոցների 45 տոկոսը հատկացրել է Կառավարությունը: Աշխատանքներն ավարտին կհասցվեն մինչ տարեվերջ:

Վարչապետին ներկայացվել է նաև Մ-3 Մարգարա-Վանաձոր-Տաշիր-Վրաստանի սահման ճանապարհի 13 կմ հատվածի միջին նորոգման աշխատանքները, որոնք ավարտվել են, թերություններ ի հայտ գալու պատճառով շինարարական ընկերությունը սեփական միջոցների հաշվին 10 կմ հատվածում տեղադրում է ասֆալտբետոնի նոր շերտ: Ծրագրի արժեքը 494 մլն դրամ է: Միջոցները հատկացրել է Կառավարությունը:

Նշվել է նաև, որ մեկնարկել են Մ-3 Մարգարա-Վանաձոր-Տաշիր-Վրաստանի սահման ճանապարհի 4,06 կմ հատվածի միջին նորոգման աշխատանքները: Կառավարությունը ծրագրի իրականացման համար հատկացրել է ավելի քան 199 մլն դրամ: Ավարտվել են նաև Բազում համայնքի մոտ Մ-3 Մարգարա-Վանաձոր-Տաշիր-Վրաստանի սահման 4.8 կմ ճանապարհի հիմնանորոգման աշխատանքները:

Կառավարության ղեկավարի հաջորդ կանգառը եղել է Սպիտակ համայնքի Կաթնաջուր բնակավայրը, որտեղ սուբվենցիոն ծրագրով կառուցվել է հանուն Հայրենիքի կյանքը նվիրաբերած հերոսների հիշատակի հուշահամալիր: Շինարարական աշխատանքներն ավարտվել են, կառուցվել է մոտ 1700 քմ պուրակ, որի համար հատկացվել է 42 մլն դրամ: Միջոցների 50 տոկոսը հատկացրել է Կառավարությունը: Վարչապետը ծաղիկներ է խոնարհել հուշահամալիրին՝ հարգանքի տուրք մատուցելով հերոսների հիշատակին:

Հաջորդիվ վարչապետը ծանոթացել է Տ-5-7՝ Մ7 Շիրակամուտ - Լեռնավան (Տ-5-38) ճանապարհի հիմնանորոգման աշխատանքներին, որոնց 90%-ն ավարտվել է: 1,1 կմ ճանապարհի հիմնանորոգման արժեքը կազմել է ավելի քան 148 մլն դրամ, որը հատկացվել է Կառավարության կողմից:

Նիկոլ Փաշինյանը եղել է նաև Սպիտակ քաղաքի մոդուլային տիպի մանկապարտեզի կառուցման շինհրապարակում: Մոտ 1300 քմ մակերեսով, 144 տեղ հզորությամբ մանկապարտեզի կառուցման ծրագրի համար հատկացվել է 787 մլն 532 հազար դրամ: Միջոցները տրամադրել է Կառավարությունը:

Վարչապետի վերջին կանգառը եղել է Սպիտակ համայնքի Լեռնավան բնակավայրում, որտեղ կառուցվել է ջրամբար: Մոտ 12 հազար 500 խմ ծավալով գեոմեմբրանային թաղանթով ջրամբարի կառուցման սուբվենցիոն ծրագրի արժեքը 34 մլն 948 հազար դրամ: Միջոցների մի մասը հատկացրել է Կառավարությունը: Համայնքի մասնաբաժինը ներդրվել է ՄԱԶԾ-ի կողմից:

Նիկոլ Փաշինյանը Սպիտակ համայնքում հարգանքի տուրք է մատուցել 44 օրյա պատերազմում զոհված հայորդիների հիշատակին:

Վարչապետը կարևորել է համայնքներում իրականացվող ծրագրերի որակյալ և ժամանակին իրականացումը՝ ընդգծելով, որ Կառավարությունը տարբեր ծրագրերի միջոցով շարունակելու է ակտիվորեն նպաստել մարզերի զարգացմանը:

Նիկոլ Փաշինյանի այցը Լոռու մարզ ավարտվել է: