Վարչապետ Նիկոլ Փաշինյանը ներկա է գտնվել օգոստոսի 21-ին և 22-ին Սևանա լճի ափին անցկացվող «Վարչաֆեստ 2026» երիտասարդական երաժշտական մրցույթ-փառատոնին:

Փառատոնի շրջանակում կատարումներով հանդես են եկել եզրափակիչ փուլ անցած երաժշտախմբերը: Եզրափակիչ փուլին նախորդել են կենդանի լսումներ Հայաստանի տարբեր մարզերում, որոնց մասնակցել են երիտասարդ երաժիշտներից կազմված շուրջ 100 խմբեր: Մրցութային բոլոր փուլերում մասնակիցների կատարումները գնահատել է ոլորտի ճանաչված մասնագետներից կազմված ժյուրին՝ ապահովելով ընտրության մասնագիտական և անաչառ ընթացքը։ «Վարչաֆեստ 2026»-ի ժյուրիի կազմում ընդգրկված են՝ Վահագն Հայրապետյանը, Կառլ Մանուկյանը, Վահագն Գևորգյանը, Նարինե Զարիֆյանը և Մհեր Մանուկյանը։ Լսումների արդյունքներով նախ ընտրվել են 50 լավագույն խմբերը, իսկ եզրափակիչ փուլ անցել են 20 երաժշտախմբեր:

Եզրափակիչ փուլի մասնակիցների կատարումներից հետո վարչապետը հանդես է եկել ելույթով, ողջունել բոլոր մասնակիցներին և ժյուրիի անդամներին, խոսել փառատոնն ընդլայնելու և ամենամյա դարձնելու, ինչպես նաև լավագույն մասնակիցների մասնակցությամբ գալա համերգ կազմակերպելու գաղափարի մասին: Նիկոլ Փաշինյանը նաև շնորհակալություն է հայտնել Կրթության, գիտության, մշակույթի և սպորտի նախարարությանը, բոլոր գործընկերներին, ովքեր մասնակցություն են ունեցել այսօրվա փառատոնի կազմակերպման գործում: «Այսօրվա հրաշալի օրը, համոզված եմ, հրաշալի ավարտ կունենա այն պահին, երբ մրցանակակիրներին կպարգևատրենք և, իհարկե, նաև Գրան Պրի մրցանակը ստացողը նորից ելույթ կունենա մեր ծափահարությունների ներքո»,-իր խոսքում նշել է երկրի ղեկավարը։

Հաջորդիվ՝ «Վարչաբենդ» երաժշտական խումբը հանդես է եկել ելույթով, որում հանդես է գալիս և հարվածային գործիքներով նվագում վարչապետ Նիկոլ Փաշինյանը:

Կատարումներին հաջորդել է պարգևատրման արարողությունը: Հաղթողները որոշվել են ինչպես պրոֆեսիոնալ ժյուրիի գնահատականների, այնպես էլ ներկա հանդիսատեսի քվեարկության արդյունքներով։ Գլխավոր մրցանակը հանձնել է վարչապետ Նիկոլ Փաշինյանը, որին արժանացել է «Red Line» խումբը: Առաջին հորիզոնականը զբաղեցրել է «Dophamin» խումբը, երկրորդ հորիզոնականը՝ «Noosh» խումբը, երրորդ հորիզոնականը՝ «Folkastic» խումբը: Փառատոնի մրցանակային ֆոնդը կազմում է 10 մլն դրամ՝ նախատեսված գլխավոր, առաջին, երկրորդ և երրորդ մրցանակակիրների համար։ Գլխավոր մրցանակը 4 000 000 դրամ է, առաջին մրցանակը՝ 3 000 000 դրամ, երկրորդ մրցանակը՝ 2 000 000 դրամ, երրորդ մրցանակը՝ 1 000 000 դրամ:

«Վարչաֆեստ 2026» մրցույթ-փառատոնն իրականացվում է ՀՀ կրթության, գիտության, մշակույթի և սպորտի նախարարության կողմից՝ ՀՀ Կառավարության աջակցությամբ։ Փառատոնը կոչված է դառնալու երիտասարդ երաժիշտների բացահայտման, նրանց ստեղծագործական ներուժի զարգացման և համագործակցության նոր հնարավորությունների ձևավորման կարևոր հարթակ՝ միաժամանակ նպաստելով կենդանի երաժշտության մշակույթի զարգացմանը, Հայաստանի մշակութային կյանքի հարստացմանը, ձևավորել ամենամյա մշակութային իրադարձություն, որը կնպաստի Հայաստանի երաժշտական կյանքի ակտիվացմանն ու միջազգային ճանաչելիության բարձրացմանը։

Փառատոնի շրջանակում եզրափակիչ փուլ անցած երաժշտախմբերը մասնակցել են նաև «Վարչաֆեստ» վրանային ճամբարի ծրագրին, որի շրջանակում ստեղծվել է փորձի փոխանակման, համագործակցության և նոր ստեղծագործական կապերի ձևավորման նպաստավոր միջավայր: Փառատոնի երկու օրերի ընթացքում տեղի է ունեցել նաև համերգային հատուկ ծրագիր՝ սիրված երաժշտական խմբերի մասնակցությամբ։