Վարչապետ Նիկոլ Փաշինյանն այցելել է Լոռու, Կոտայքի և Գեղարքունիքի մարզեր՝ ծանոթացել իրականացված և ընթացքի մեջ գտնվող ծրագրերին:

Վարչապետի առաջին կանգառը եղել է Դեբեդի նորակառույց «Հարություն և Սյուզան Մանգոյանների» անվան միջնակարգ դպրոցում:

Նիկոլ Փաշինյանը շրջել է դպրոցում, ծանոթացել իրականացված աշխատանքներին և ստեղծված պայմաններին: Ծրագրի արժեքը 780 մլն դրամ է, որը հատկացրել է «Հայաստանի մանուկներ» հիմնադրամը (ՔՈԱՖ): Դպրոցի գույքը հատկացրել է Կառավարությունը: Առաջիկայում պետության ֆինանսավորմամբ դպրոցում կկառուցվի նաև մարզադահլիճ: Դպրոցը նախատեսված է 192 աշակերտի համար: 2025թ. դրությամբ փաստացի սովորողների թիվը 114 է։ Աշխատանքները մեկնարկել են 2024թ. ապրիլին, ավարտվել 2025թ. սեպտեմբերի 1-ին:

Վարչապետը շնորհավորել է ներկաներին դպրոցի բացման առիթով և շնորհակալություն հայտնել Մանգոյան ընտանիքին, «Հայաստանի մանուկներ» հիմնադրամին, բոլոր բարերարներին, ովքեր ներդրում են ունեցել դպրոցի կառուցման գործում:

Նիկոլ Փաշինյանն այդ համատեքստում անդրադարձել է Հայաստան-Սփյուռք հարաբերությունների հարցին և ընդգծել նոր ժամանակներում այդ գործընթացում նոր բանաձևեր որդեգրելու անհրաժեշտությունը: Վարչապետի խոսքով՝ այսօրվա իրադարձությունն այդ նոր մոդելի արտահայտությունն է. «Հիմա մենք աշխատում ենք այն թեմայի վրա, թե ինչպես անենք, որ սիներգիա առաջանա և մեր ուժերը կարողանանք մեկտեղել: Կարծում եմ՝ այս դպրոցը նաև այդպիսի բանաձևի արտահայտություն է, որովհետև մեր բարերարների, ՔՈԱՖ-ի ջանքերով կառուցվել է շենքը, գույքը հատկացրել է Կառավարությունը»:

Երկրի ղեկավարը երեխաներին խոստացել է նաև, որ առաջիկայում Կառավարությունը, ՔՈԱՖ-ի գործընկերների հետ միասին ստանդարտներին համապատասխանող փակ մարզադահլիճ կկառուցեն դպրոցի մոտակայքում:

Նիկոլ Փաշինյանը կարևորել է Կառավարության «Լավ սովորիր, որ լավ ապրես» ուղերձի գաղափարաբանությունը, որը մեր ինքնաճանաչողությունից բխող մի արտահայտություն է: Վարչապետի խոսքով՝ սոցիալական կամ հումանիտար օգնությունը մարդկանց կյանքում ընդհանրապես որևէ բան չի փոխում, այլ երբեմն ավելի վատացնում է: Եվ հետևաբար, ըստ Նիկոլ Փաշինյանի, դպրոցը մի տեղ է, որտեղ աշակերտները պետք է սովորեն լավ ապրել և յուրաքանչյուրը պետք է ընտրի իր լավ ապրելու ուղին. «Եվ այդ լավ ապրելու պատկերացումները պետք է կապված լինեն արժեքներով, որոնք պետք է արտահայտված լինեն պետության, նրա կարգավորումների, հարաբերությունների, Սահմանադրության, օրենսդրության, պետականության, համայնքի, մարդու հարաբերությունների մշակույթում»:

Վարչապետը կրկին շնորհակալություն է հայտնել բարերարներին, ՔՈԱՖ-ին կատարված աշխատանքի համար և համոզմունք հայտնել, որ այդ համագործակցությունը շարունակություն է ունենալու:

Ամփոփելով խոսքը՝ Նիկոլ Փաշինյանն ընդգծել է. «Համոզված եմ, որ այս դպրոցը Դեբեդի երեխաների ավելի լավ կյանքի սկիզբ է, և մենք պետք է նրանց ուղղորդենք այդ ուղղությամբ, որովհետև երեխաների, ընտանիքների, գյուղացիների, քաղաքացիների լավ ապրելը նշանակում է, որ երկիրն է լավ ապրում, երկրի լավ ապրելը նշանակում է, որ քաղաքացիներն ավելի լավ են ապրում: Սա մեր պարզ, շատ պրիմիտիվ հնչող, բայց շատ բարդ իրագործելի նպատակն է, բայց ես համոզված եմ, որ մենք, ի հեճուկս բոլոր բարդությունների, այդ նպատակը կիրագործենք»:

Այնուհետև վարչապետն այցելել է Վանաձորի բժշկական կենտրոն, որտեղ ծանոթացել է ինֆեկցիոն մասնաշենքի կառուցման աշխատանքներին: Ծրագրի արժեքը 956 մլն դրամ է, որից 214 մլն դրամը հատկացրել է Կառավարությունը, իսկ մյուսը դրամաշնորհային միջոցներ են: Ինֆեկցիոն մասնաշենքն ունի 50 մահճակալային ֆոնդ: Աշխատանքները մեկնարկել են 2023թ. մայիսին, ավարտվել 2025թ. մարտին: Բժշկական սարքավորումներով և գույքով հագեցման համար ծախսվել է 99 մլն դրամ:

Նիկոլ Փաշինյանի հաջորդ կանգառը եղել է Վանաձորի թիվ 8 հիմնական դպրոցում, որտեղ իրականացվել են հիմնանորոգման աշխատանքներ: Ծրագրի ընդհանուր արժեքը կազմել է 245 մլն դրամ, որը հատկացրել է Կառավարությունը: Դպրոցը նախատեսված է 358 աշակերտի համար: Վերանորոգման աշխատանքները նախատեսվում է ավարտին հասցնել հոկտեմբեր ամսին: Դպրոցն ընդգրկված է Կառավարության «Մինչև 2026 թվականը կառուցվող, հիմնանորոգվող կամ վերակառուցվող 300 դպրոցներ»-ի ծրագրում ընդգրկված դպրոցների ցանկում։

Հաջորդիվ՝ վարչապետն այցելել է Վանաձորի թիվ 9 հիմնական դպրոց, որտեղ նույնպես իրականացվել են հիմնանորոգման աշխատանքներ: Վերջինիս համար պետբյուջեից հատկացվել է ավելի քան 140 մլն դրամ: Դպրոցը նախատեսված է 183 աշակերտի համար։ Այս դպրոցը ևս ընդգրկված է Կառավարության «Մինչև 2026 թվականը կառուցվող, հիմնանորոգվող կամ վերակառուցվող 300 դպրոցներ»-ի ծրագրի ցանկում:

Վանաձորի N9 հիմնական դպրոցում կառուցվել է նաև նոր մարզադահլիճ: Ծրագրի նպատակով Կառավարությունը հատկացրել է 224 մլն դրամ։

Կոտայքի մարզում վարչապետն այցելել է Հրազդանի թիվ 2 հիմնական նորակառույց դպրոց: Ծրագրի ընդհանուր արժեքը կազմում է շուրջ 1 մլրդ 912 մլն դրամ: Ծրագիրն իրականացվել է Ասիական զարգացման բանկի Սեյսմիկ անվտանգության բարելավման ծրագրով և ՀՀ Կառավարության համաֆինանսավորմամբ: Նորակառույց դպրոցը նախատեսված է 432 աշակերտի համար: Շինաշխատանքները մեկնարկել էին 2021թ. նոյեմբերին, ավարտվել 2025թ. օգոստոսին: Դպրոցն ընդգրկված է Կառավարության «Մինչև 2026 թվականը կառուցվող, հիմնանորոգվող կամ վերակառուցվող 300 դպրոցներ» -ի ծրագրում ընդգրկված դպրոցների ցանկում։

Նիկոլ Փաշինյանը հանդես է եկել ելույթով՝ շնորհավորելով բոլորին հերթական դպրոցի բացման առիթով: Վարչապետը գոհունակությամբ նշել է, որ դպրոցի կառուցումը, բացումը, մեզանում դառնում է շատ սովորական, առօրեական մի բան: Վարչապետ Փաշինյանը կարևորել է «Լավ սովորիր, որ լավ ապրես» ուղերձի ընկալումը և հույս հայտնել դպրոցներում ստացած գիտելիքներով երեխաները կընդլայնեն լավ ապրելու մասին Կառավարության ունեցած պատկերացումները և իրենք իրենց պատկերացումներով կձևակերպեն լավ ապրելու իրենց չափանիշները՝ որպես անհատ, որպես դպրոց, որպես հանրություն, որպես համայնք:

Երկրի ղեկավարն անդրադարձել է դպրոցաշինության ծրագրերին՝ կարևորելով որակով շինարարական աշխատանքների իրականացումը: Այդ համատեքստում, վարչապետն ընդգծել է, որ դպրոցաշինության ոլորտում ակնհայտ դրական տեղաշարժ է նկատվում:

Նիկոլ Փաշինյանը կրկին երախտիքի և շնորհակալության խոսքեր է հղել Հայաստանի Հանրապետությունում աշխատող, արդյունք ստեղծող և օրենքով սահմանված իրենց հարկերը վճարող բոլոր քաղաքացիներին։ Վարչապետը կարևորել է նաև այն հանգամանքը, որ երեխաններն էլ պետք է արձանագրեն այդ փաստը՝ դպրոցը կառուցվել է քաղաքացիների, այդ թվում՝ իրենց ծնողների վճարած հարկերով: Այդ համատեքստում, Նիկոլ Փաշինյանը կարևորել է ՀԴՄ կտրոն ստանալու, պահանջելու անհրաժեշտությունը. «Եթե մենք ՀԴՄ կտրոն չենք պահանջում, չենք ստանում և չենք վերցնում, մենք հնարավորություն ենք տալիս, որ այդ մեր գնածի 20%-ը չմտնի պետական բյուջե»: Վարչապետը հորդորել է ներկաներին՝ պահանջեք և վերցրեք ՀԴՄ կտրոնը, որպեսզի ավելի շատ դպրոցներ կառուցվեն:

Նիկոլ Փաշինյանը նշել է, որ Կառավարությանն ուղղված շնորհակալական խոսքերը վերադարձնում է բոլոր այն մարդկանց, ովքեր աշխատում են, արդյունք են ստեղծում, օրենքով նախատեսված իրենց հարկերը վճարում. «Իսկ նրանք, ովքեր տնտեսական առանձնապես մեծ գործունեությամբ զբաղված չեն, շնորհակալություն եմ հայտնում, որ չեն զլանում ՀԴՄ կտրոնը պահանջել, որովհետև ՀԴՄ կտրոնը դպրոց է, մանկապարտեզ է, ՀԴՄ կտրոնը պետություն է, ՀԴՄ կտրոնը անվտանգություն է, ՀԴՄ կտրոնը ճանապարհ է և այլն»:

Ամփոփելով խոսքը՝ վարչապետը ներկայացրել է Կառավարության պատկերացումը Հայաստանի մասին. «Մենք Հայաստանը պատկերացնում ենք այսպիսին, ինչպիսին այս և մյուս նորակառույց դպրոցներն են, որոնք անթերի չեն և, իմիջիայլոց, երբեք էլ անթերի չեն լինելու, բայց ուրախ են, ապրող են, հեռանկար ունեցող են, լուսավոր են, ընդարձակ են, շունչ ունեն, հոգի ունեն, կյանք ունեն, ապրելու են և լավ են ապրելու»:

Հրազդան համայնքում Նիկոլ Փաշինյանն այցելել է նաև «Մոդուլային» տիպի 144 տեղ հզորությամբ մսուր-մանկապարտեզ, որտեղ շինաշխատանքներն ավարտական փուլում են: Ծրագրի ընդհանուր արժեքը կազմում է 929 մլն դրամ, միջոցները տրամադրվել են ՀՀ պետբյուջեից:

Գեղարքունիքի մարզում Նիկոլ Փաշինյանն այցելել է Ջիլի նորակառույց միջնակարգ դպրոց, ծանոթացել իրականացված աշխատանքներին և ստեղծված պայմաններին: Դպրոցի կառուցման արժեքը կազմում է ավելի քան 880 մլն դրամ, որը հատկացրել է Կառավարությունը: Ծրագրի իրականացման արդյունքում կառուցվել է նոր մոդուլային դպրոց և նախակրթարան՝ 20 տեղ-հզորությամբ։ Ծրագիրը մեկնարկել է 2021թ., ավարտվել 2025թ.:

Վարչապետը հանդես է եկել ելույթով, շնորհավորել ներկաներին Ջիլի դպրոցի աշխատանքի մեկնարկի առթիվ, ուրախությամբ արձանագրել, որ շուտով ճանապարհի կառուցման աշխատանքները նույնպես կավարտվեն: «Երևի գյուղի պատմության մեջ սա ամենամեծ ներդրումն է՝ ճանապարհը և դպրոցը միասին վերցրած: Եվ սա շատ կարևոր արձանագրում է: Մենք սրանով կարևորում ենք կրթության հասանելիությունը բոլոր մարզերում, բոլոր գյուղերում, այսպիսի միջավայրի հասանելիությունը բոլոր մարզերում, բոլոր բնակավայրերում»,- ասել է վարչապետը և հավելել. «Ես ուզում եմ, որ դուք այս դպրոցում ձեզ զգաք որպես ազատ և հպարտ քաղաքացի, այս դպրոցում զգաք ձեր ուժը, ձեր ստեղծագործության ուժը, գիտելիքի ուժը, այս դպրոցում դուք հասկանաք, որ այսօր, ամեն օր կառուցվում է ձեր ապագան»։

Վարչապետն անդրադարձել է «Ապագան այսօր է» կարգախոսին և նշել. «Դա, առաջին հերթին, վերաբերում է դպրոցին, որովհետև այն, թե այսօր երեխան դպրոցում ինչով է զբաղված, ինչ որակով է զբաղված, այդ ամեն ինչով 80 և ավելի տոկոս ճշգրտությամբ մենք կարող ենք կանխատեսել նրա ապագան»,- ասել է Նիկոլ Փաշինյանը և ընդգծել. «Կարգախոսը նրա մասին է, որ ապագան պետք չէ կանխատեսել, պետք չէ ապագայի մասին գուշակություններ անել, ապագան այսօր կառուցվում է նաև ձեր աշխատանքով՝ երեխաները ինչքանով են ընկղմված կրթական պրոցեսում, այդ կրթական պրոցեսը ինչքանով է իրենց հաճելի, ինչքանով է նրանց օժտում հենց այն գիտելիքներով, որոնք նրանց պիտի օգնեն կյանքում գտնել իրենց սիրած աշխատանքը և ինչքանով պրոֆեսիոնալ կլինեն իրենց սիրած աշխատանքի մեջ»:

Խոսելով աղքատության մասին, վարչապետը համոզմունք է հայտնել, որ այսօր աղքատության պրոբլեմն 80% դեպքերում ուղիղ աներկբա, առանց շեղումների կախված է կրթության որակից։ «Ես ուզում եմ ասել, որ մեր հավատը հետևյալն է, որ երեխաներից յուրաքանչյուրը բացառիկ տաղանդ ունի, և կրթական համակարգի դերը, մեր բոլորի դերն է աջակցել նրանց, օգնել նրանց, խրախուսել, որպեսզի և՛ իրենք, և՛ մենք իրենց տաղանդը բացահայտենք: Հատկապես ինչո՞ւմ են տաղանդավոր երեխաները՝ մեկը տաղանդավոր մարզիկ է, մյուսը տաղանդավոր դերասան է, երրորդը տաղանդավոր գիտնական է, չորրորդը տաղանդավոր տնտեսվարող է, հինգերորդը տաղանդավոր ուսուցիչ է, վեցերորդը տաղանդավոր արվեստագետ է, յոթերորդը տաղանդավոր քաղաքական գործիչ է, ութերորդը տաղանդավոր դիվանագետ է և այլն։ Եվ հենց սա է դպրոցի դերակատարումը և նշանակությունը»,- նշել է Նիկոլ Փաշինյանը:

Ամփոփելով իր խոսքը՝ վարչապետն ընդգծել է. «Սիրելի երեխաներ, սա ձեր տաղանդի արտահայտման տարածքն է: Սա ձեր տունն է: Դուք այստեղ պետք է ապրեք և դուք այստեղ ամեն օր պետք է տեսնեք, ստեղծեք սեփական ձեռքերով ձեր ապագան։ Այս գրքերը և այն դասերը, որոնց դուք առնչվում եք, այս դասասենյակները, այս դպրոցը, ուսումնական ծրագիրը, որոնց հետ դուք առնչվում եք, ձեր ապագայի բանալին են։ Եվ ես ցանկանում եմ, որ դուք տիրապետեք, գտնեք այդ բանալին և գտնեք այն դուռը, որով պետք է բացեք ձեր բարեկեցիկ, երջանիկ, ազատ ապագա»: